إيه العــقد دي..؟؟!!

إيه ياناس مالكو؟؟

ليه كل ما أدخل مدونة حد ألاقيه مخنوق ومكتئب ومش طايق نفسه ولاطايق عيشته..

-------------------

أنا في كذا حاجة مزعلاني..

الأولى..

"بـــنــــــوتـــــة" صاحبة أصدي اللي كانت صاحبة مدونة "ورقــــة و قـلـــــــم"..

زعلت جداً جداً جداً لما قفلت مدونتها..

خاصة إن يوم ماهي قفلتها كنت أنا ممنوعة من النت عشان المذاكرة فمقدرتش أودعها ولا أسلم عليها..

أنا ببص على قائمة المدونات عندي لقيته العنوان اللي عندها "البوست الأخير"..

اتخضيت فتحت المدونة لقيتها محذوفة نكدت أوي أوي ساعتها قعدت أبص على آخر تعليق ليها عندي وعنيا دمعت حسيت إني فعلا افتقدتها

بحبها أوي البنت دي مع إني علاقتي بيها عالمدونة وخلاص بس مش عارفه ليه حاساها صاحبتي من زمان..

عالعموم مفيش فإيدي غير إني أدعيلها بالخير كل ما أفتكرها..

وبقولها وحشتيني موووووووووووووت يابنوتة وحاسة إني مفتقداكي ومفتقدة كتاباتك الرائعة بجد وحشتيني..

************************

تاني حاجة مزعلاني..

المدونين اللي متخانقين مع بعض..

المفروض خلاص بقى يلينوا دماغهم ويفتكروا كل لحظة حلوة عاشوها مع بعض وميخلوش الزعل يعمي قلوبهم..

ويسامحوا بعض ومهما كان هم كانوا في يوم من الأيام إصحاب..

يارب إهديهم ورجعم لبعض زي الأول وأحسن كمان..

اللهم آمين..

**********************

تالت حاجة والأخيرة..

مش كل ماحد يضايق ويتخنق يروح قافل مدونته..

أنا الإسبوع اللي فات قررت اقفل مدونتي وقعدت أقول لبابا أنا فاشلة ومبعرفش أكتب حاجة وحاجتي كلها غبية وكلام من هذا القبيل..

قالي ياشمقمق..(دلــعي) يابنتي مش كل حاجة كدا تخليكي تيأسي بسرعه اعتبري المدنة دي دفتر مذكراتك اكتبي فيها ايه اللي مضايقك وإيه اللي مفرحك إيه طموحاتك وأحلامك وأهدافك..

بابا حبيبي ربنا يخليهولي يارب وميحرمنيش منه طول ما أنا عايشه هو وماما أقنعوني وسهلوا الحكاية عليا لإني كنت فاكراها لازم اقعد أألف حاجات فصيحة وبليغة بس كدا بقت إيزي بالنسبالي..

وبردو منساش فضل بسبس ناو..(بسمة) هي كمان فضلت تقنعني..ربنا يحفظهالي ويخليهالي يارب

********************

وفي الأخير خلينا فاكرين دايما إن الدنيا دي فانية ومش مستاهلة كل اللي بنعمله دا

وبعدين "هــونهــــــا وتـهـــــــون"..