حصن من ذهب..

السلا م عليكم ورحمة الله وبركاته

~~~~~~~~~~~~~~~~

انهردة كنت أنا وبسمة خارجين عند وحدة صحبتنا المهم بابا جه أخدنا من عندها الساعة 11 تقريباً (جه متأخر عشان كان عنده شغل أنا بوضح السبب عشان متقولوش علينا ساطين برة البيت في أنصاص الليالي)

المهم بابا راح السوق قالنا في شوية حاجات هشتريها استنوني عقبال ما أرجع أنا وبسمة كنا قاعدين في العربية مستنينه شفت البنات والستات ماشيين في الأسواق للساعة 11 بليل ادايقت يعني السوق واللف والدوران اللي عالفاضي للساعة 11 بليل محبكش يعني وكمان ماشيين لوحدهم من غير حد يحميهم واللي دايقني أكتر بقى مناظرهم وطريقة لبسهم للعباية والنقاب العباية اللي هي زي الإسدال ديقة ومحدده هيأتهم بطريقة فظيعة وغير كدا كلها زخرفة وترتر واللي أدهى من كدا فتحة النقاب واسعة بشكل وميك أب كااااااااااامل على عينها كحل بقى ومسكرة و آي شادو وعشان تكمل بقى الليلة لابسة كعب ماشية تتمخطر بيه تك ..تك كإنها ماشية تقول للناس بصولي..

بجد بجد أدايقت يعني إنتي المفروض لابسة العباية السودة دي والنقاب عشان تستري وتصوني نفسك مش عشان تعرضي نفسك للذئاب البشرية .. خاصة كمان إنك نازلة السوق اللي الرسول صلى الله عليه وسلم قال عنه شر بقاع الأرض.. فبما إن الحاجة اضطرتك إنك تنزلي السوق ومن غير محرم خلاص إحمي نفسك بالسبل المتاحة ليكي.. لكن بالله اللي نازلة بالمنظر الدنيء دا اللي بتشوه بيه سمعة الحجاب والمحجبين نازلة كدا ليه عشان تصون دينها وتصون نفسها لا والله دي نازلة ونيتها تلفت نظر دا وتفتن دا.. والشباب غصب عنهم بيبصوا يعني واحدة ماشية بايعة نفسها بالشكل دا ليه ميعاكسهاش وميحترمهاش هي تستاهل بصراحة أنا مبلومش الشاب في الحكاية دي..

وإعتراضي مش على دول بس .. شوف بنات مصر بقى أنا لما بنزل الشارع هناك ببقى ماشية مندهشة من مناظر البنات في الشوارع تبقى الواحدة فيهم لابسمة بنطلون مش عارفه بصراحة أوصفه إزاي واللي بيموتني من الضحك اللي لابسة (برمودا.. آنتي بنطولون .. جيبة قصيرة وبوت...) وتروح مغطية شعرها بــ (حتة) طرحة مش طرحة كاملة ودي بقى مسميه نفسها محجبة أنا مش عارفه هي لابسة الحجاب ليه؟؟ ولا أقولكو أنا عارفة ليه.. لإن شعرها بيكون وحش ..ههههههههههههههههه _والله شر البلية مايضحك_

أنا بس حبيت أوضح من الموضوع دا كله مفهوم الحجاب الصح اللي ربنا أمرنا بيه

ربنا سبحانه وتعالى قال في كتابه :((يا أيها النبي قل لأزواجك وبناتك ونساّء المؤمنين يدنين عليهن من جلابيبهن ذلك أدنى أن يعرفن فلا يؤذين وكـــان الله غفوراً رحــيماً )). الأحزاب59.

يعني ربنا قال :(( لأزواجك وبناتك ونساّء المؤمنين)) أظن بنات المسلمين اللي هو إحنا

وقال:(( ذلك أدنى أن يعرفن فلا يؤذين)) يعني ربنا سبحانه وتعالى مش مستفيد حاجة إحنا اللي مستفيدين إحنا اللي مش هنتأذي

والأمر في الآية واضح:((يدنين عليهن من جلابيبهن)) يعني: يرخين ويسدلن عليهن مايسستترن به كالملاءة.

*******************************

شروط الحجاب الشرعي:

~~~~~~~~~~~~

* أن يكون ساتراً لجميــع الجسم.

* أن لايكون زينة في نفسه أو يكون فيه زينة من رسوم وزخارف وكتابات.

* أن يكون سميكاً غير شفاف فلا يظهر ماتحته.

* أن يكون واسعاً فضفاضاً فلا يبدي تقاطيع الجسم.

* أن لا يكون مشايهاً لملابس الرجال.

* أن لايكون مشابهاً لملابس الكافرات.

* أن لا تكون الملابس معطرة إذا كانت ستمر برجال.

ومش عايزة أكتر في الكلام أظن الآية كفت ووفت..

وفي النهاية اسأل المولى عز وجل أن يهدي فتيات المسلمين ويصلح شأنهم ولايجعلهم فتنة.. اللهم آآآآآآآآآآآآآآآآمين

_______________________________