السلام عليكم ورحمة الله وبركاته
~~~~~~~~~~~~~~~~
امبارح كنا مسافرين سفرية فسحة

بس إيه بقى كانت فسحة عسسسسسسسسسسل لزقت فيها أوي أصدي اتبسطت فيها أوي لإنه حصلت طفــــــــــــرة انا وبسمة قلنا لماما وبابا عايزين إيمان صاحبتنا الفلسطينية تيجي معانا في السفرية دي قالولنا ماشي وماله بس دلوقتي المشكلة في مامتها وباباها هي ..اللي عاملين لها حظر تجول.. ماما راحت تكلم مامتها عشان تقنعها واحنا بقى إيه إيدينا على قلوبنا.. الغريب بقى إن مامتها وافقت وبدون أي مناقشات الدور والباقي بقى على باباها
راحت مامتها تقوله عالحكاية وتسأله راح رادد عليها اه مع بسمة وشيماء خلاص تروح طبعا عادي.. (إحم إحم .. ثقة إحنا) المهم إحنا التلاتة كنا هنطيييييييييييير من الفرحة..

صحينا الصبح تاني يوم لبسنا واتجهزنا وعدينا على إيمان اخدناها وكان معانا عيلتين تانيين إصحابنا

البلد دي بينا وبينها ساعة ونص قبل مانوصل هناك في عالطريق قلعة كبيرة من أيام زمان كانت بتاعة الأتراك وكدا أخدنا فيها جولة ممتعة جدا ومشينا في القرية بقى نفسها اللي كانوا الناس العاديين عايشين فيها كانت اه مرعبة شوية عشان البيوت قديمة أوي ومكسرة ومليانة حفر بس بصراحة كانت مغامرة جميلة

مشينا بقى وصلنا البلد أول ماوصلنا طبعا الأكل قبل كل شيء كنا هنموت من الجوع روحنا مطعم اتغدينا هناك بعد كدا بقى روحنا المــــــــــــلاهي .. أول حاجة عملناها روحنا صلينا الظهر والعصر بعد كدا بقى قعدت أنا وبسمة وإيمان شوية ع النجيلة نتكلم ونضحك بعد كدا يادوب بابا جابلنا التذاكر الأستاذة إيمان كانت مصدعة ومش قادرة تقوم ووحدة صاحبة ماما هي صاحبتي بردو من العيلتين اللي معانا نادتني عشان أعملها شوية حاجات في اللاب توب بتاعها طبعا مقدرش أزعل طنط وأقولها لأ أولا لإنها أكبر مني ثانيا لإن طنط دي غالية عليا أوي



راحت النصابة أصدي الأستاذة بسمة قالت خلاص عقبال ما إيمان ترتاح وانتي تخلصي من اللي وراكي أروح ألّعب نونا.. (أختنا الصغيرة) وارجع نلعب احنا قلنالها ماشي

راحت اخده التذاكر كلها لعبت بيها لوحدها.. واااااااااء شفتوا بقى

رحنا قلنالها مالناش دعوة احنا عايزين تذاكر راحت جابت 3 تذاكر بس لعبنا بيهم لعبة وحدة اللي هي السفينة اللي بتطير في الهوا دي كانت راكبة معانا طنط التانية .. طنط دي بقى سكر بتعاملنا زي مانكون صاخبتنا ومن سننا قالتلنا هركب معاكوا عشان متخافوش

ركبنا اشتغلت اللعبة في الأول هادية ومفيش مشاكل بعد كدا بقت سريعة بشكل بقت تطلع فووووووووووووووووووووووق وتنزل مرة وحدة وأنا وبسمة اشتغلنا صويت غصب عننا إيمان بقى فضلت متنحة وساكتة المشكلة بقى ان اللعبة مكنش فيها حد غيري انا وبسمة وايمان وطنط وبنتين صغننين يعني انا وبسمة كان صوتنا واضح طنط تقولنا امسكوا جامد واسكتوا بس والله مقدرناش بقيت حاسة ان الصويت بيطلع من نفسه وبقيت بقى وانا في عز الصويت والعياط أبص عالراجل اللي بيشغلها وأقول.. هتروح فين من ربنا ياماااااااااااااااااان..؟؟ بسمة بقى في عز الخوف كانت هتموت عليا من الضحك

فضلوا بقى طول الوقت يعايروني ويقولولي.. هتروح فين من ربنا يا ماااااان.. وانا اقولهم اسكتوا وهما ولا هما هنا

بعد كدا نزلنا دايخين ماشيين نخبط في بعض.. قعدنا ارتحنا شوية كان العشا أذن صلينا بعدها قعدنا نحكي ونصور ومشينا بعد كدا من الملاهي.. مع اني والله كان نفسي ألعب العربيات لإني بموت فيها اللعبة دي بس يلا الله يسامحك يابسمة

طبعا المشوار لايخلو من الســــــــــوق.. بكرهه بشكل البتاع دا اكتر حاجه أكرهها لما يقولوا رايحين السوق سواءً في البلد دي أو في أي حتة تانية.. خلصوا تسوق بعد كدا بقى حصل معايا موقف وحش ويكسف .. بابا كان نازل وسايبنا احنا في العربية كان راكنها قدام محلات انا كنت فاتحة الشباك اللي جنبي وحاطة شنطتي على حجري وسايباها مفتوحة وحاطه فيها إيييييييييه.. موبايلي راح أخويا المصون مد إيده في الشنطة وأخده وطلع يجري انا مكنتش أخده بالي لاني كنت منهمكة في الحديث مع بسمة وإيمان حسيت إن في حركة بصيت لقيته ماسكه وطالع يجري وبيضحك رحت بكل تلقائية .. يامامااااااااااااااااااااا إلحقي أخد موبايلي هاته وماده إيدي بقى برة الشباك وعمالة أزعق هات الموباااااااااااااااااااااااااااااااايل لقيت الناس كلها عمالة تبص عليا كله ساب اللي في إيده وقعد يبصلي ..(من حقهم بصراحة يعني لابسة عباية ونقاب وعمالة أزعق في الشارع غريبة ووحشة يعني) المهم راح رجعهولي.. أنا ايه اللي خلاني أعمل دا كله ... أصل الموبايل جديد لسه شارياه من إسبوع وبعدين نوعه (إن 95) جبته بدم قلبي فكان من حقي أخاف عليه أوي خاصة إن المكان كان مليان ناس يعني كان معرض للسرقة بس بقى بعدها حسيت بإحراج شديد..

بعد كدا الحمد لله مشينا بعد يوم طويل من التعب والإرهاق والمتعة إتمنينا لوتكون معانا صاحبتنا حبيبتنا رانيا وفاطمة بس الحمد لله
وصورت هناك شوية صور دول اتنين منهم






ملحــــــــوظة: إيمان ..(المذكورة آنفاً) حلوة المذكورة آنفا دي ..طلعت شاطرة وبعرف أكتب وأنا مش عارفه.. المهم ايمان صاحبتنا

عملت مدونة لسا عاملاها جديد اللي حابب يروح يزورها دا الرابط .. ياريت يعني تزوروها عشان ترفعوا من معنوياتها


http://leetalzamanyarg3.blogspot.com/


واسفة على الكلام الكتير اللي مالهوش لزمة دا .. بس الرغي بقى لما ينقح..