أولا بشكر كل اللي متابعني وبيزوروني عارفة والله إني مقصرة بس المذاكرة والله معنديش وقت وكمان لسا محطيتش قائمة المدونات بس وعد مني هتابعكوا بإذن الله وارجع أزوركوا تاني بس افضى شويه وبشكر كمان كل اللي علقولي عالبوست اللي فات

~~~~~~~~~~~~~~~~~~~~

التاج دا جالي من بسمة أنور وجودي هما الاتنين قالولي في نفس اليوم بس بسمة قالتلي عالميل قبل جودي
بس بشكرهم هما الاتنين كفاية افتكروني

اسيبكوا مع التاج وإجاباتي اللذيذة العسولة



اسمك؟
الشيماء صلاح


المشهورة بيه وسط اصحابك؟
شيما اللئيمه..(للأسف)


سنك؟
15سنة و 5 شهور و5 أيام.. (مميزة في كل حاجه ياناس)


اسم مدونتك؟
"شــــوشــــو هانـــــم"


مجال دراستك؟
أولى ثانوي


الصورة الرمزية لمدونتك بتعبر عن إيه؟
أنا بحبها أوي صورة الطفلة دي .. وحاساها بتعبر عن شخصيتي


هل فكرت في اغلاق مدونتك والسبب؟
اه فكرت.. كنت وقتها حاسة اني فاشلة ومبعرفش اكتب حاجه خالص وكنت مكتئبة


ايه ردة فعلك لو حد قل ادبه عليك في تعليق؟
لو التعليق قليل الأدب خالص مثلا في كلام مش محترم همسحه لاني محبش مدونتي يكون فيها حاجه مش كويسه
لو مثلا بشتمني وحاساه متغاز هرد عليه ببرود وهقوله الله يسامحك


اسوأ مدونة؟
مدونة "بسمتي" بتاعة بسمة أنور.. هههههههههههههههههههه
بغلس يابت بسمه متزعليش
مفيش ولا مدونة وحشة صادفتها لغاية دلوقتي الحمد لله



هيحصل ايه للإيميل بتاعك بعد ماتموت؟
أولا اللهم اجعل اخر كلامي في الدنيا "لا إله إلا الله"
إيميلي هيموت معايا لان عامة محدش بيسأل فيا ولا بيبعتلي عليه حاجه إلا نادراً دا وانا حية اومال لما اموت بقى اكيد هيموت هو كمان


اديت الباس وورد بتاعك لحد قبل كدا؟
اه بسمة صلاح اختي.. عارفه باس ووردات ايميلاتي كلها واللوك كود بتاع موبايلي كمان كل حاجه يعني..
السفر بالنسبة ليك..؟
بحب السفر أوي بردو لما بنكون رايحين مكة والمدينة طبعا
وكمان بيكون مغامرة جميلة جدا جدا خاصة إذا كان مع صاحبتي حبيبتي فطومة واحنا رايحين مصر مع بعض
جربت السفر بري وبحري نفسي أسافر جوي مسافرتش بالطيارة غير مرة واحدة وأنا عندي 3 سنين ومش فاكراها أصلاً
المود بتاعك؟
الحمد لله مزاجي حاليا عادي بس مدايقة ومخنوقة من المدرسة وكمان نفسي ننزل مصر بقى زهقت.. امتى تيجي الأجازة؟؟


بتعمل إيه في وقت فراغك؟
وقت فراغي دا طبعا لما بكون خلصت كل اللي عليا من عبادات وأعمال منزلية ومدرسية
بقعد عاللاب توب أو ممكن ألعب في الموبايل بتاعي أو بقعد أقرا في مجلات



الأكلة المفضلة؟
الكنتاكي (البروست) والفراخ بصفة عامة
ورق عنب والملوخية الطبيعية (الخضرة يعني بس طبيعية دا خاص بيا أنا) والفتة
والمكرونة البيشاميل وحاجات تاني بس دول أكتر حاجة
اه والشوكولاتة (الماكنتوش والجالكسي والتويكس والانواع الفاخر فاخر)


الصفات التي ورثتها عن والدك؟
ورثت من بابا حبيبي الإيثار والقناعة والكرم وفصيلة دمي زيه والطيبة الزيادة عن اللزوم


الصفات التي ورثتها عن والدتك؟
أنا ورثت من مامي حياتي شكلي يدي عليها وعلى تيتة (يعني عسولة) ههههههه ثقة
الهدوء والإنطوائية شوية وفي حاجات حلوة كتير في ماما بس أنا للأسف مورثتهاش

اكتر ست حاجات بتكرهها؟
الكذب.. النفاق.. التنطيش بكره اني أكون بتكلم وحد يطنشني أويسكتني بكرهها جدا جدا..
الناس المصلحجية.. الظلم.. مبحبش حد يقول عني أنانية ولا ندلة وبزعل جدا من اللي بيقولي كدا لاني أساسا بكره الصفتين دول جدا.. وفي حاجات تاني بس دول بكرههم أوي
اه في حاجة زيادة غلاسة أخويا محمد.. ربنا يغيتني.. والمدرسة ..
اه اه ونسيت أهم حاجة المواعين..ههههههههههه

اكتر ست حاجات بتحبها؟
السؤال طالب (حاجات) مش (أشخاص) فعشان كدا مش هقول أشخاص
الصلاة والقرآن.. (أنا حافظاه كله بس ربنا يقدرني وأقدر أراجعه بعد مانسيته الحكاية دي مزعلاني أوي أوي) _ الخط..( اللي هو يعني اني أكتب لأن الحمد لله عندي موهبة خطي حلو) _القمر والليل والبحر والمطر_ الكمبيوتر والنت وموبايلي_وبلدنا في الأرياف اللي هي بلد بابا (منقطين) بحبها مووووووووووت _ ومدونتي طبعا

شخصيتك نوعها إيه؟


مرحة جدا الحمد لله متفائلة بالحياة عندي أمل وبريئة بس مترددة كتير في اتخاذ قراراتي ومش واثقة في نفسي وطيبة عالآآآآآآآآآآآآآآآآآآآآآآآآآآآآآآآآآآآخر وكتومة مش كل حاجة بحكيها وحساسة جدا جدا أي حاجه ممكن تجرحني أحيانا بكتم جوا نفسي وأعيط بعدين وأحيانا مقدرش دمعتي تنزل على طول .. مبحبش شخصيتي أبدا

لماذا دخلت عالم التدوين؟
لما بسمة أختي عمبت مدونة لقيته موضوع لذيذ عملت زيها

أجمل كلمة اتقالتلك في وصف مدونتك؟
"مدونتك رائعة حبيبتي"و"مدونتك جامدة وشديدة" وكلام كتير اتقالي في التعليقات بس مش فاكراه


أهمية التعليق بالنسبة ليك؟
أولا إني بحس إن كتاباتي فاشلة بحسه بيديني أمل
وبستفيد منه لو فيه نقد على حاجة في كتابتي وبفرح بيه أوي

أحسن بوست كتبته؟ وضع اللينك؟
بوست "أنتِ أنا" اللي كنت كاتباه لأختي بسومة حبيبتي:
http://shosho2022.blogspot.com/2009/01/blog-post_23.html

وبوست "يوما ما":
http://shosho2022.blogspot.com/2009/01/blog-post_18.html
كتبته عن تسيبي ليفني حاساه عبيط وبريء كدا

وبوست "صحون وياسمين" الاخير مش محتاج أحط اللينك

أفضل بوست قرأته وأفضل مدونة؟


كل اللي بزورهم بوستاتهم ومدوناتهم جميلة وممتعة جدا ولذيذة ومتنوعة مابين مرح وجد يعني
بحب مدونة (المعتصم_ ومحمد غالية_ وريمان_كيارا_ وزينب_ وادم المصري_فكرة من الزمن دا_جودي_smily rose_مهندس علي درويش_الشاعر الحزين_وردة_كاتب مصري اللي عمل مجلة ومبيزورناش ومبقيناش من مستواه خلاص_ eyad _إسلام ديو_ مصعب صلاح _سارة_موني الشريف_انتحاري_وبسومة أنور طبعا حبيبة قلبي دي_وإيمان روحي اللي بقى عندها مناعة من غلاستي خلاص_وبسمة صلاح أختي وحياتي ودنيتي كلها) وكل الناس اللي بيزوروني وبرزورهم واللي نسيت أقول اسمه ميزعلش مني لاني نسيت مش بالقصد يعني

الانترنت بالنسبة ليك إيه؟


السؤال دا مش هقدر أجاوب عليه لإن النت دا حاجة أكبر من إني أوصفها دا عالمي التاني اللي بغوص فيه وبحبه جداااااااااااااااا


تمرر التاج لمين؟؟
فكرة من الزمن دا
وردة
انتحاري
ياريت يقبلوه مني إذا مكانش جالهم قبل كدا

بس طولت عليكو خااااااااااااالص اللي قدر يوصل للجملة دي يبقى يكتبهالي في التعليق بتاعه عشان أعرف بس مين اللي باله طويل ومين اللي قال عني رغاية
اللي مش هيكتبها هعرف انه مقراش البوست كله وإنه بيستعبط عليا
♥ ♥ ♥ ♥ ♥ ♥